२०६९ साल जेष्ठ १४ गते भित्र संबिधान निर्माणको नयाँ कार्यतालिका

काठमाडौ, १६ मंसिर ।  संविधानसभाको म्याद छ महिना थपिएपछि संबैधानिक समितिको सचिवालयले आगामि जेठ ८ देखि १४ भित्र संविधान जारी गर्ने गरी नयाँ कार्यतालिका तयार पारेको छ । सचिवालयले आज बसेको विवाद समाधान उपसमितिको बैठकमा कार्यतालिका पेश गरेको हो । नयाँ कार्यतालिकामा संविधान निर्मार्णमा देखिएको विवादित विषयमा आगामि पुस १५ भित्र सहमति गर्ने,फागुन १ देखि १५ भित्र संविधानको पहिलो मस्यौदा जारी गर्ने लगायतका समयहरु तोकिएका छन् । सचिवालयले बनाएको कार्यतालिकालाई मसिंर १८ गते बस्ने संवैधानिक समितिको बैठकले अनुमोदन गरेपछि संसदमा पेस गरिनेछ । संविधानसभाको म्याद थपिएपछि विहीबार विवाद समाधान उपसमितिले कार्यतालिका निर्माणको जिम्मा सचिवालयलाई दिएको हो । दलहरुवीच अहिलेसम्म शासकीय स्वरुप, निर्वाचन प्रणाली र राज्यपुर्नसंरचनाको विषयमा जटिल विवाद कायम रहेकै छ । राज्यपुर्नसंरचनाका सम्बन्धमा भने दुई महिनामा सुझाव दिने गरी आयोग गठन भएको छ ।