चितवन, जेठ २६,
चितवनको मुग्लिन बजारमा सुन चोर्न ताला फोरेर पसलभित्र छिरेका दुईजनालाई प्रहरीले सुन पसलभित्रै पक्राउ गरेको छ ।इलाका प्रहरी कार्यालय मुग्लिनका प्रहरी निरीक्षक लोकबहादुर गुरुङका अनुसार आइतबार बिहान करिब ३ बजेको समयमा उनीहरूलाई स्थानीय त्रिवेणी सुन पसलबाट पक्राउ गरिएको हो ।सुन पसलको ताला काटेर भित्र छिरेको भनी स्थानीयले दिएको सूचनाका आधारमा प्रहरीलाई खबर गरेपछि मुग्लिन प्रहरी सो पसल घेराउ गर्न पुगेको थियो । प्रहरी आएको चाल पाएपछि पसलको भित्रपट्टिबाट उनीहरूले सटरमा ताला लगाएका थिए ।पछि प्रहरीले भित्तो फोरेर उनीहरूलाई पक्राउ गरेको जनाएको छ । पक्राउ पर्नेमा राजकुमार थापा र रमेश थापा रहेका प्रहरीले जनाएको छ । एकजना चितवनका र एक नुवाकोट घर भएका उनीहरूको विषयमा अनुसन्धान भइरहेको जिल्ला प्रहरी कार्यालयका प्रहरी नायब उपरीक्षक शान्तिराज कोइरालाले बताउनुभयो । घटनाको विषयमा बेलैमा थाहा पाएकाले चोरी हुन भने नपाएको प्रहरीले जनाएको छ ।
नेपाली रुपैयाँ विनिमय
